निर्वाण

— बसन्त महर्जन

सिमाहः हाः थें हाइ
खँग्वःत फान्ताङ फुन्तुङ, फान्ताङ फुन्तुङ

प्याःथाय् ध्वग्गी थें
खँग्वःया जंगल चकनी
अनथन मदयेक जि तनी

जिगु सर्वय् – निर्वाण
जि धयाम्ह हे बुद्ध
खँग्वलं अभिसप्त जि
जंगल ध्यंसा
हि पुसा जुयाः बवलनी खँग्वःया जंगल
झन झन तना वनी ।

सिमाहः हाः थें हाइ
खँग्वःत फान्ताङ फुन्तुङ, फान्ताङ फुन्तुङ
खँग्वः ब्वलनी, ब्वलनी
मस्यु, थ्व क्रमबद्धताया अन्त्य
जि गबलय् निर्वाण जुइ ?