सफू वार्ता

(निगू भायया बाःछिपौ ‘लायकू’ २०६५ श्रावण १–१५) स प्रकाशित सफू वार्ता)

छितः दकले अप्वः गन च्वना ब्वने यः ?
जितः न्ह्याथाय् च्वना नं ब्वनेयः । यः–मयः धैगु मदु । न्ह्याथाय् च्वना ब्वंसां छुं मपाः ।

छितः दकले यःम्ह नेवाः च्वमि सु खः ?
छुं विधा विशेष जक ब्वनेम्ह जि मखु । थी थी विधाय् थीथी हे च्वमिपिं यः । गथे कविताय् सिद्धिचरण श्रेष्ठ, दुर्गालाल श्रेष्ठ व बुद्ध सायमि खःसा उपन्यासय् धूसां सायमि । अथे हे समालोचनाय् माणिकलाल श्रेष्ठ, कमलप्रकाश मल्ल, इन्द्रिमालीपिं जितः तसकं यःपिं च्वमि खः ।

छितः यःगु मचा साहित्यया सफू छु खः  ?
कवि दुर्गालालं अनुवाद यानदीगु महाकवि पुश्किनया ‘माझी व लुँयाम्ह न्याँ’ ‘एलिस इन वण्डरल्यान्ड, बालउपन्यास, म्याक्सिम गोर्की व लेभ टाल्सटायया मचा बाचंचात जितः तसकं हे यः । गुलिं गुलिं ला थम्हं हे नं नेपालभाषां अनुवाद यानागु दु ।

छितः दकले यःगु सफू छु खः ?
जे. कृष्णमूर्तिया ‘फ्रीडम फ्रम नोन’ ।

छितः अतिकं प्रभावित याःगु लेख रचना ?
जे. कृष्णमूर्तिया ‘फ्रीडम फ्रम नोन’ ।

सुयातं ब्वनेमाःगु सफू धकाः छु सफूया नां धया दी ?
सफूया सिफारिस याये न्ह्यः सुयात व छु सन्दर्भ विशेष खः धैगु खँ महत्वपूर्ण जुइ । उकिं इब्यः, मनू व सन्दर्भ स्वयाः जक ब्वनेमाःगु सफू धकाः नां कायेगु पायछि जुइ ।

छु सफुुतिं छिगु विचाः हिइका ब्यूगु दु ?
जे. कृष्णमूर्तिया दार्शनिक सफू ‘फ्रीडम फ्रम नोन’ हे उगु सफू खः गुकिं जिगु बिचाः जक हिइका ब्यूगु मखुसे जीवन हे हिइकाः बिल । उगु हे सफूया प्रभाव खः थौंकन्हेया थ्व जीवन ।

हाकनं छकः ब्वनेत मन वंगु सफू ?
म्याक्सीम गोर्कीया ‘मां’ उपन्यास ल्हातिइ लाःगुया लच्छि दुने स्वकः तक लिसा कया ब्वना । हाकनं छकः ब्वने मास्ति वः । तर थौंकन्हे उगु सफू जिके मदुगु जक मखुुसे इलं नं भाय् मल्हाः ।

छिं थौंकन्हे छु सफू ब्वनाच्वनागु दु ?
म्हो इलय् नं यक्व ल्याखय् ब्वनेगु ताः तयाः योजनावद्ध रुपं नेवाः सम्बन्धी विभिन्न भाषाया सफू व नेपालभाषाया हे थी थी विधाया सफूत रि–रिडिङ यानाच्वनागु दु । चिचिधंगु सफू जूसा छन्हुं हे निपाः स्वपाः नं क्वचायेक ब्वनेगु अले गुलिं सम्बन्धित विषय जक ब्वनेगुलिं थ्व हे धकाः सफूया नां कायेमछिं ।

छिगः यःगु साहित्यिक विधा छु खः ?
जितः यःगु साहित्यिक विधा न्हूबाखं, उपन्यास व कविता खः ।