––बसन्त महर्जन
कविता धकाः गुलि नं च्वया
फुक्कयात कविता हे यायेत
वात्तुवावां ब्वँने,
थम्हं तुं
गन गन लुमधं, अन अन
शब्द तने, शब्द लिकाये
अथवा लिकथं च्वये,
हाकनं ब्वँने
माःथाय् तने, माःथाय् लिकाये
अथवा झ्याझिरिं खुना छ्वये ।
च्वयेवं सिक्क यःगु कविता नं भचा लिपा मययेफु
छुं ई नुगः साःगु कविता नं
निन्हु प्यन्हुं पुलां जुइ, मयइ
मयःगु कविताया कवि जि गथे जुइ यइ ?
मयःम्हलिसे ह्वनेगु थें हे कष्ट मयःगु कविताया कवि जुइ
तर कविता थें खुइ मफु थःत
थःगु हे सिर्जना खयां नं ‘करेक्शन’ याये मफु ।
कष्टमय जीवनया मालिक– विचरा जि
कविता करेक्शन याये ज्यू
तर जि कविता मखु । कविताय् जि अनुवाद जुइमफु ।
जीवन कविता थें हे जूसा गुलि ज्यू आहा
कविता थें जीवन करेक्शन याये दःसा गुलि करेक्शन याये धुन जुइ
कविता झ्यारझिरिं खुइगुया सवाः गुलि माकुसे च्वं
मयःगु जीवनयात स्याना म्वाये दःसा आहा, गुलि माकुक्क म्वाये दइगु जुइ ।
१६ अक्टोवर १९९४